كل يومين طالع لينا واحد و يقول انة رجل اعمال .... يعني اية رجل اعمال ... و على اساس اية الاسم دة
طب اية الشروط اللازمة علشان تحصل على اللقب دة
علشان كدة بمفهوميتي قعدت ادور و ابحث علشان اعرف ازاي ابقى رجل اعمال
و توصلت للشروط دية
- اولا اشتريلك سيجار تخين و طويل (( كل ما تخن السيجار في ايدك .... كل ما بقيت رجل اعمال جامد ))
- حاول دايما تتكلم و السيجار في بقك... و كل ما تكلم واحد قولة تعرف يا اكسلانس ...
- هاتلك نضارة شمس سودة من العتبة و البسها 24 ساعة .....(( لازم تبقى سودة ما ينفعش لون تاني ))
- شوفلك كام واحد من صحابك و هاتلهم نضارات سودة بردة و سميهم بودي جارد (( بودي جارد دة وظيفة حارس شخصي ))
- خدلك شقة في اي عمارة في اي حتة و اكتب عليها مكتب استييراد و تصدير ...(( ممكن تكون بتلم كياس الزبالة و تصنعها ... قول ان عندك مكتب استيراد و تصدير بلاستيك ))
- اسال دايما ... هوة الدولار بكام النهاردة (( حتى لو عمرك ما شفتة ))
- اختارلك اسم غريب و طويل و مجعلص ...و يفضل يكون بعيد عن اسمك الحقيقي ... علشان لو اتقبض عليك
- اشتريلك من العتبة شنطة جلد ... (( زي الشنطة اللي بيحط فيها تجار المخدرات فلوسهم في الافلام ))
- لما البلية تلعب معاك شوية ادخل كام صفقة مشبوهه ... (( لحم حمير ... دوا منتهي الصلاحية ... قمح بدودة ... نفايات سامة )) لغاية ما تقف على رجليك .. خلي بالك الصفقات دية هتشهرك
- ادخل دايما مناقصات الحكومة ..... ما تقلقش الحكومة دايما بتاخد اسوأ خدمة بأعلى سعر ... هتغنى غلط يا معلم
- او ما تسمع عن خصخصة ... روح و اشتري علطول ... ما تقلقش من موضوع الفلوس (( انت ممكن تاخد قرض من بنك حكومي بضمان المصنع الحكومي اللي هتشترية .... شفت الحكومة بتساعد رجال الاعمال ازاي ؟؟
- افتحلك مصنع كاراتية و سناكس و شوية حاجات مسرطنة ... علشان تاكل عيش
- اشتكي دايما من غلاء المعيشة ... (( قول مثلا كيلو الكافيار بقى بكام .... الوييسكى سعرة نار ... الشقة في باريس ايجارها غالي عليا )) علشان ما حدش يفكر يستلف منك
- اتعرفلك على رقاصة او مطربة مغمورة و اصرف عليها ببذخ و تجوزها عرفي .... و بعد فترة طلقها و اقتلها
طبعا بعد الحاجات اللي عملتها دية اكيد بقيت اشهر من النار على العلم ... تروح بقى تستوردلك صفقة لحمة حمير على كلاب على قطط و توزعها على الناس الغلابة ... و ترشح نفسك في مجلس الشعب ... لزوم الحصانة
و اول ما تاخد الحصانة يا ريس تروح عاملك كام صفقة مخدرات على حشيش على ادوية فاسدة ... بعدها تلبد في الضرة علشان ريحتك ما تطلعش
و بكدة بقيت رجل اعمال جامد و متصيت ... و قدامك حل من الاتنين
- تاخد قروض كتير من البنوك بضمانات وهمية و تهرب على لندن و تعيش في ((عز ))
- او تنضم للحزب الوطني ... و ساعتها هيختاروك انك تبقى وزير .. و انت عارف الباقي بقى
و عيش و خلينا نعيش
ملحوظة : انا غير مسؤول عن الاستخدام الخاطئ لهذة التعليمات ...... لو اتقبض عليك انا ما اعرفكش ولا قولت ليك حاجة
فهمي
