ميصلحي .....

يا ترى بتفكر في اللي بفكر فية ...... عايز تحرقة
فعلا يا جماعه .. احنا ابتدينا في مرحلة جديدة .. مرحلة غسيل المخ .. " من اجل مستقبل اولادنا "
و انفجرت فينا ماسورة من الاعلانات التلفزيونية الجميلة .... بداية من اشربها ما تفصصهاش ... انتهاء بحملة انقاذ مصيلحي

و لما جيت بمفهوميتي احلل شخصية مصيلحي لقيتة :

• شخص ما كنتش تسمع عنة خالص و مرة واحدة بقى سيد الكل  بين يوم و ليلة ... ازاي .. الله اعلم 
• اسمة مختارينو بعناية علشان يدل على شخصيتة (( مصيلحي )) 
• مش مهتم باي حد ولا طلبات اي حد ... بدليل المشروب اللي اول مرة نسمع عنه 
• بيصرف بالعبيط على مواضيع مالهاش لازمة  300 الف قزازة 
• الريس بتاعة زية ... و مصيلحي لو عمل حاجة على مزاج الريس يبقى سيد الكل و لو ما عجبوش يلبس ال 300 الف قزازة  
• المطلوب من الشعب هوة اللي ينقذ مصيلحي و الريس بتاعه (( حملة انقذ مصيلحي ))

طب و انا مالي .... يعني هوة يعك يعك .... و احنا المطلوب مننا نلبس ال300 الف قزازة علشان ننقذ بسلامتة ؟؟

يا اخي ..... تيييييييييييييييييييت

بس للاسف الموضوع مش بايدينا ..... هتبان النتيجة بعد الانتخابات

طبعا عارفين ... مين مصيلحي  و مين الريس بتاعه

و بعد اذنكو .... رايح اولع في مصلحي .... حد معاة كبريت ؟؟

اشربها ...ما تفصصهاش ....

اعلان جامد جدا ....... مع اني شايفة بايخ

بس ذو مغزي عميق ....... اشربها      (( ما تفصصهاش ))

اعلان بيعمل ليك غسيل مخ ... ..... (( دة غير غسيل المعدة ))

تعال نفكر مع بعض ... اية الحاجة المطلوب منك انك تشربها .... و ما تسالش عنها (( ما تفصصهاش ))

• الحاجات الاصفرة .... اللي في الافلام العربي من 40 سنة 
• شعارات الحكومة البايخة ..... من اجل مستقبل اولادك ..... امال طول السنين اللي فاتت كانو بيشتغلو من اجل مستقبل مين ؟؟؟؟
•  الحرامية اللي بيتقبض عليها بعد الحادثة بنص ساعه و يعترفو .... و بعد كدة يطلعو مش همة 
• الماس الكهربائي اللي داير على حل شعرة في البلد و عمال يولع يمين و شمال من غير حساب 
• الباشا بتاع الزراعة اللي خللى بلدنا فيها اكبر مركز لعلاج السرطان في الشرق الاوسط 
• صاحب قرار القضاء على الثروة الداجنة في بلدنا ... قال انفلونزا قال .... (( شوف كام واحد مات من الانفلونزا في السنين اللي فاتت و قارنها بكام واحد مات من حوادث الطرق .... و من انهيارات البيوت ))
• اكتشافنا فجاة ان السبب بتاع السحابة السودة هو قش الرز اللي بنحرقة من 2000 سنة 
•  غير الحاجات اللي بنشربها ... و ما بنفصصهاش   
•   

و تحياتي ..... بعد اذنكو علشان هفصصها .... اصل ما بحبش اشربها

فهمي

بطيخة ..

يعني اية بطيخة ......
الفزورة بتاعه زمان .. خضرا من برة و حمرة من جوة و فيها لب ....... يمكن
بس بالنسبة ليا البطيخة ... خضرة من برة و الله اعلم من جوة .... و بنروح عند بتاع الفاكهه و نقعد ننقي و نخبط على البطيخة و نشيلها على قلبنا للبيت .... و برضة الله اعلم اية من جوة ....
البياعين حبو يرضونا ... قاللك على السكين .. و فاتح ليك بطيخة حمرا .... و يفتحلك بطيخة قدامك ... و تشيلها برضة لحد البيت على قلبك و اول ما تيجي تاكلها ..... تلاقي طعمها عامل زي البرسيم  (( ما اعرفش طعم البرسيم ... ممكن تسالو الخروف بتاع العيد بمناسبة الايام دية على طعمه ))
طب تفتكرو نعمل ... نعمل سونار على البطيخة .... ولا ناخد عينة منها و نحللها قبل ما نشتري  ..... ولا نجيب خبير اجنبي ينقي لينا البطيخ ...... ولا نبطل نزرع بطيخ و نستورد بطيخ من برة

بس تعرفوا اية حل اموضوع دة ..... بسيط جدا جدا جدا

نجيب بزرة كويسة و نزرعها و نعتني بيها كويس .... و بكدة هتمشي على المثل اللي بيقول حط في بطنك بطيخة صيفى و هتضمن البطيخة

لكن السؤال اللي بيطرح نفسة دلوقتي ...... اية اللي في حياتنا زي البطيخة .... و نقدر نحلة بان احنا نجيب بذرة كويسة

اسبكو بقى تفكرو في البطيخ و البذر و ازاي تزرعوا

فهمي