الحد الادني للتبرع

بيقولك في دولة بطيخنجان كانو بيعزو الحاكم بتاعهم قوي .... على الاخر

و في يوم من الايام مواطن عادي خالص سايق عربيتة في الشارع و الشارع واقف بقالة كتير

فقعد يسال عن السبب لقى الناس بتقول (( ان مجموعه ارهابيين خطفو الحاكم و بيهددو يا اما تدفعو فدية 10 مليار دولار او يولعو فية قدام الشعب ))  و احن دلوقتي بنجمع تبرعات

و بما ان المواطن دة غلبان و خاف ما يتبرعش لحسن يمسكوة قاللهم .. (( اية الحد الادني للتبرع ))

قالو لية (( 10 لتر بنزين ))  ........

ولع .......

مريض نفسي (( مختل عقليا ))

المصطلح دة بقى منتشر كتير جدا اليومين دول على لسان الحكومة و التصريحات بتاعتها

مش عارف اية السبب و لية و اية هوة تعريف المختل عقليا ..
بردة علشان على الاقل اعرف اميز ما استناش تصريحات الحكومة اذا كان اللي عمل كدة مختل عقليا او مريض نفسي

و طبعا لاحظت ان الجماعه دول و اخدين راحتهم و بيعملو اللي على مزاجهم  دة حتى المستشفى بتاعهم اسمة سرايا
قولت لما ادور و اشوف ازاي ابقى واحد منهم و اخد الحصانة (( دة حتى الحصانة بتاعتهم احسن من بتاعة مجلس الشعب .. ))

لقيتها شوية خطوات بسيطة :

1. اتفرج على حلقات مجلس الشعب و الشورى (( و اهم حاجة تصدق اللي بيقولوة ))
2. اتفرج على خطب الريس في عيد العمال و صفق جامد و استنى تنفيذ الوعود 
3. ادي صوتك لانتخابات الحزب الوطني و طلع الكارنية الاخضر  (( بينفع في لجان المرور  و نقط التفتيش ))
4. لو سمعت حد بيشتم او بيهاجم الحكومة انهرة بشدة كانة بيشتمك بالظبط ... و يستحسن لو تبلغ عنة 
5. لو لقيت طبور طويل اوقف فية ... اكيد هتبقى حاجة مفيدة (( 5 ارغفة عيش .... ربع كيلو لحمة .... انبوبة غاز ... دمغة بجنية )) حتى لو طلعت و هدومك مقطعه او فقدت اي عضو من اعضائك ... انتة بردة الكسبان دة جنية الحكومة بجمل و شوف انت بقى اشتريت بكام 
6. اسمع دايما اغنية ما شربتش من نيلها و انت ماشي في الشوارع و مستمتع بالهواء النقي و المية الجميلة و اللقمة الهنية 
7. لو سمعت ان البنزين هيغلى .... اشتريلك 4 لتر و خزنهم عندك (( هبقى اقولك استخدامهم فيما بعد )) 
8. ما تصدقش المظاهرات اللي بنشوفها في بلاد برة اللي بتطالب بحقوق حيوان الباندة او الضفدع المخطط و حمايتة من الانقراض ..... و انزل شارك في المظاهرة اللي في شارعكو اللي بتطالب بمية نضيفة في الحنفية و عيش في الفرن و انبوبة غاز  و كهربا ساعتين في اليوم 
9. مرتبك اللي بتدية ليك الحكومة دة مرتب عظيم (( احسبها من حيث مبدا جنية الحكومة بجمل )) بس انت اللي مش عارف تصرفة ازاي 
10. حاول ما تتابعش الاعلانات المستفزة اللي بتتكلم عن شاليهات في الساحل الشمالي باسعار مغرية ... و اللي بيقول بحب الصيف علشان بلعب جولف و بعمل جاكوزي و كدة 
11. ما تتفرجش على الافلام و البرامج اللي بتجيب ناس من العشوائيات و تحكي عن ظروفهم  دول كومبارس من السيما (( احنا زي الفل ))
12. لو حسيت برغبة انك عايز تموت حد او تولع في نفسك امسك نفسك و قاوم 
13. لو مقدرتش تقاوم بقى طلع البنزين اللي شارية من ايام الرخص وولع في نفسك 

بكدة هيطلع بيان رسمي انك كنت مختل عقليا او مريض نفسي

** ملحوظة : لما تولع في نفسك حط بنزين كتير و ولع كويس علشان لو اتمسكت و انت عايش هتتظبط

و لو هنحسبها بالعقل (( 80 مليون مواطن )) و مستشفى امراض عقلية واحد ..... يا اما كل الشعب عاقل .... او المجانين مالين الشوارع


تحياتي ..... ابو المفهومية  

الفانوس السحري

لسة النهاردة كنت قاعد بتفرج على قناة افلام قديمة بالصدفة جابت فيلم عن المصباح السحري و اللي بتفركة و يطلعلك منة عفريت لابس كوتشي طرفة متني و يقوللك شبيك لبيك و الحوارات دية .... دة كان حتى العفريت بيقعد يتحايل عليك علشان تتمنى ...

بعديها الافلام دية اختفت و بطلت تظهر .... مش عارف لية ...  العفاريت هاجرت ولا اية
دة حتى بسمع ان واحد لقى مصباح و عاررف ان العفريت جواة ... و قعد يفرك في المصباح لحد العفريت ما جالة تسلخات ... و بردة العفريت مش عايز يطلع

يا ترى اية السبب ... لو جيننا نحللها هنلاقي عدة اسباب

• الجو بقى ملوث ووحش قوي 
• خايف يظهر لحسن الباشا الغالي بتاع المالية يفرض علية ضرايب جديد (( و اثبت بقى يا عفريت ان المصباح دة ما فيهوش كنوز من جوة ))

• الوضع لسة زي ما هو (( يعني لسة الريس هوة هوة  و بعض الوزرا الطيبين مع تغيير الوظايف ))
• شوف الاسعار بقت اية كان زمان العفريت بالف جني يقدر يحقق كل الطلبات و يشبرق على البني ادمين دلوقتي ما يقدرش على طلباتهم 
• لو طلع العفريت مش هيلاقي خرم ابرة يسكن فية ... و يمكن البلطجية يستولو على الفانوس بتاعه و يقعد في الشارع 
• انة هيلاقي طلبات غريبة جدا  (( عايز عيش - عايز اشرب مية نضيفة - عايز اشتغل - عايز انبوبة غاز - عايز اموت و ارتاح - عايز اتجوز نانسي عجرم )) غير الطلبات بتاعة زمان 
• هيلاقي اغلب الطلبات محتاجة انة يقف في طوابير مالهاش اول ولا اخر  
• احتمال يعتقلوة اشتباة في اي حاجة و حلني لما يثبت انة كان في الفانوس ساعه الحادثة  
• و ممكن يموت في حوادث الطرق او يجيلة فشل كلوي من المية  او ياكل لحمة فاسدة او قمح بدودة او رغيف عيش مسلح بامعادن الثقيلة 
• و لو جاع هيخاف ياكل من الحاجات المسرطنة اللي بقت زي الهوا في حياتنا  
• دة حتى يخاف لحسن العمارة اللي يظهر فيها تقع علية  او  يحصل ماس كهربائي و يولع فية 
• و حاجات تانية كتير ما ينفعش اقولها لاسباب امنية .... هههههههههههههه

و انا من مكاني هذا بوجة نداء للعفريت اللي جوة المصباح (( اوعى تطلع و قاوم لو حد قعد يفرك في المصباح و امسك نفسك و لو على جثتك .... جوة احسن من برة ))

شفتو ازاي احنا شعب بنستحمل اكتر من العفريت ؟؟؟

يا رب الاقي فانوس اسكن جواة ... انا و العفريت ولا حد تالتنا  ......  فهمي

• 
  

موضوع كوتة المراة في المجلس

بصراحة  موضوع كوتة المراة في المجلس دة كان محيرني من زمان
و قاعد افكر فية و شاغل بالي علطول  و اشمعنى العدد دة و النسبة دية من الاعضاء

لدرجة اني قعدت على النت اشوف الدول التانية هل عندهم كوتة زيينا ولا لأ
بردة ما لقيتش
قعدت بردة على اليوتيوب اتفرج على حلقات مجلس الشعب القديمة .... يمكن اقدر استنتج اي حاجة !!

لغاية ما وصلت للنظرية الموحدة لمجلس الشعب المصري
و هية

((( ما ينفعش تصفيق من غير زغاريط )))

تحياتي .... فهمي 

الكيلو 75

طبعا اول ما تقرا كلمة الكييلو 75 هيجي في بالك اللحمة ... ان الكيلو بقى ب 75 جنية
بس احب اطمنكو ان انا ما اعرفش حاجة عن اللحمة ... انا مقاطعها من ساعه ما وصل الكيلو ل 25 جنية

لكن الكيلو 75 لية حكاية غريبة معايا
الطبيعي بتاعي اني بسافر كتير .... و العادي بتاع الطرق ان في يفط على الطريق مكتوب عليها المسافة اللي فاضلة ليك و توصل
دة طبعا غير الحاجات التانية زي المطبات و الحفر و عمدان النور المسروقة و الردار  و نقط التفتيش  و خلافة

الكيلو 75 دة حتة في الصحرا ... ما بتعديش فيها نملة الطريق .... طب اية مشكلتة ؟؟؟
المشكلة ان في واحد ابن 30 تييييت  ماسح حتة من السبعه علشان تبقى الكيلو 15 .... بردة هتقللي دة العادي
ما المرشحين اللي تحت القبة حاطين صورهم على كل يفط المرور كانها معمولة مخصوص للانتخابات .....

المشكلة في اني عديت عليها كتير و كل مرة ابص عليها و اقول مين اللي عمل كدة ... و بعدين في مرة نزلت وو قفت في الصحرا ابص على اقرب قرية او مركز للمنطقة دية ما لقيتش ..... امال الشخص اللي عمل كدة .... لية ؟؟؟؟  يعني طالع مخصوص للصحرا و مشي المسافة دية كلها لغاية ما وقف هنا و قعد يمسح في السبعه و بعدين مشي ....؟؟


بصراحة لغاية دلوقتي مش لاقي سبب مقنع لكدة .....

لو حد لقى سبب مقنع يا ريت يقوللي