اقرار ذمة مالي

سمعت خبر غريب النهاردة ....

قال اية ... الريس فاق من الغيبوبة و قدم اقرار ذمة مالية (( قالو للحرامي احلف .....))

بس قعدت اضحك قوي على حكاية الذمة دية

بس بردة بيني و بين نفسي قعدت احسب الموضوع  لقيت ان الريس على قد حالة  مش لاقي شغل لابنة

و ما رضيش يستغل سلطاتة في تعيين ابنة في وظيفة محترمة .... دة من قلة الوظايف في بلدنا

الريس قرر ان يتنازل لابنة عن الوظيفة بتاعتة و امرة لله 

متحف الثورة .... و العهد البائد ان شاء الله

ان شاء بعد ربنا ما يعدي الايام دي على خير .... و ربنا ينصر الحق و الشباب

و كان من ضمن المقترحات انهم يسمو الميدان باسم ميدان الشهداء او يعملو نصب تذكاري في الميدان للشهداء

لكن جة في بالي فكرة انهم يعملو متحف كمان ... اسمة متحف الثورة

و الطبيعي هتكون مكوناتة

• آلاف الشعارات الجامدة اللي اخترعها الشعب المصري 
• شوية طوب و زلط و سنج بتوع البلطجية 
• صور بطاقات البلطجية بتوع الحزب 
• الجمال و الخيل المستعملة وو موقعه الجمل 
• شوية اجندات اجنبية مختلفة على الشباب بتوع حماس و ايران و اسرائيل
• الكائنات الفضائية و سلاحف النينجا اللي ساعدو في الانقلاب 
• عربيات الداخلية اللي ولعت 
• سندويتشات كنتاكي و ما كدونالز بتاعه العملاء 
• الفلوس المزورة  و الدولارات اللي بيوزعوها عليهم  
• الناشطين السيايين اللي اتدربو على ايد الموساد 
• مشاهد مصورة من التغطية التاريخية للتلفزيون المصري للاحداث  
• كام صورة للميدان و هموة مليان 
• كارنيهات الحزب الوطني 
• صورة للرريس و هوة بيتخلع .... او يحنطوة بالكرسي في بترينة قزاز (( اذا ما قدروش يخلعوه  من على الكرسي ))

و تحياتي للشباب الثورجي ..... من فهمي ابو المفهومية  

ديموقراطية

بمناسبة اليومين دول .... كلمة لقيتها بتتقال كتير في كل الدول العربية

كلة بيقول ديموقراطية .... بصراحة قعدت اسمعها 30 سنة من غير ما افهم هية اية علشان ما شفتش حد بيمارسها

و اكتشفت ان اغلب حكامنا العرب (( ربنا يديهم طولة العمر )) بصراحة كلهم من المعمرين  بيقولوهها دايما في خطاباتهم

و قعدت ادور عن معنى الكلمة دية ... لقيتها في الاساس كلمة اجنبية و بتتنطق (( ديموكراسي ))

و من هنا اكتشفت الغلط انهم ترجموها حرفيا و ليس معنويا

قسمو الكلمة لمقطعين المقطع الاول

ديمو : يعني خليكو مستمرين لازقين اوعو تفصلو و هو فعل امر واجب التنفيذ

الكراسي : مكان بيتقعد علية و بيقصد بية السلطة

و ترجمة الكلمة على بعضها : خليكو لازقين في الكراسي .... و يستخدم نوع قوي من الغراء للعطف بين الكلمتين

يعني الزق في الكرسي باقوى نوع من الغراء ......

تحياتي ....